大家好！今日我想同大家分享我湊仔嘅經歷。話說我個仔嚟緊九月就讀小一，我都諗緊幫佢報一啲課外活動興趣班，想小朋友可以探索多啲唔同嘅興趣，一來可以發掘佢唔同嘅長處，二來可以訓練佢點同其他小朋友相處。

點知呢件事好衰唔衰，傳到去我啲親戚度，唔知佢哋係善意定係八卦，個個都教我點樣培養個仔，個個都有唔同意見。

佢姑姐就教我一定要逼佢去學琴，仲話依個時勢唔識兩三樣樂器，去學校interview會好蝕底。佢姨丈又教我要去書展買定幾十本練習，有英文Grammar，有珠心算，有普通話拼音，星期一至日都要安排個小朋友做練習，小一就要開始催谷佢咁先會成功。佢阿叔又話學游水冇乜用㗎啦，籃球足球呢啲大路嘢更加唔好再學，依家潮流興學劍擊，一個唔覺意好似張家朗咁攞埋金牌，到時就間間學校等著你揀。

我某程度上都明白佢哋係為我個仔好，但我更加明白每個小朋友都有佢哋唔同嘅長處同需要。我最驚嘅係我唔跟佢哋嘅建議去安排我小朋友嘅路向，遲吓佢哋會不斷質問我，到時又要同佢哋每個人解釋一大輪，我就真係驚會忍唔住爆炸，哈哈。

#Mami Wailo #天機 #HKWisdom