我今年30歲，喺21歲嗰年，我同當時嘅男朋友奉子成婚。話說喺我地結婚3年後，我前夫被公司裁員，跟著佢就開始意志消沉，日日怨天怨地唔搵工做，瞓到黃朝白晏先起身，起身唔係上網賭錢，就係成個廢青咁打足全日機，個個月都係等我養佢。呢啲恍如單親媽媽嘅日子我過咗一年，最終我真係忍無可忍，決定要同佢離婚。我冇要到佢1蚊贍養費，我當時只係唔想同佢再有任何瓜葛。

直至到今年，佢主動聯絡返我，話想見下個仔。咁我就諗，雖然我好憎呢個人，但係我都唔想剝削我個仔見佢爸爸嘅權利，所以我應承咗佢，我答應左一個月最多兩日，俾佢同個仔相處。由於疫情，我前夫都唔係次次帶個仔出街玩，好多時都係留喺佢屋企，話同隻狗仔玩一日就返屋企。玩左幾次之後，我問個仔喺爸爸度玩得開唔開心，佢就同我講話好開心，仲想取消晒星期六日嘅課外活動，唔想再去游水班同埋英文班，想個個禮拜都去爸爸度。

於是我就好嬲，係咁問個仔喺爸爸度除咗玩狗仔之外，究竟仲有乜嘢做，個仔嘅答案令我極度憤怒。佢話爸爸俾佢一日飲四五杯珍珠奶茶，仲係叫外賣送到上門，唔使落街買。仲話，爸爸每次都會幫佢隻食雞遊戲課金，有時課金兩三百蚊，有時課成千蚊，幫佢買咗好多武器。我個仔仲話，爸爸同佢講如果想每星期都可以嚟飲珍珠奶茶同有爸爸幫你課金，就同媽媽講話你唔想再上游水堂同英文堂，咁你就可以成日嚟爸爸度喇。

做人母親甚艱難，我自問已經將全副精神放喺個仔度，佢話鍾意上外國人嘅英文堂，我就幫佢報名，佢話鍾意同同學仔去學游水，我就個個月交學費，目的都係想佢開心。但係佢見咗佢爸爸幾次，就已經搞到佢價值觀錯晒，食野冇晒節制，到時又糖尿又癡肥又頹廢就真係慘。我個仔好似已經將我咁多年含辛茹苦嘅努力忘記晒。究竟係咪我諗多咗？我俾我個仔見返我前夫係咪錯咗？如果你係我，你會點樣做？

#Mami Wailo

#天機

#HKWisdom