# 台灣陽明山靈異事件簿

記得在新冠疫情前去咗台灣陽明山其中一間溫泉酒店幾日。嗰次旅行係全女班一齊去玩嘅，Check in後攞埋鎖匙我哋就準備入房，入房前我都有禮貌地敲敲門先， 一入到去成間屋感覺係白𠽌𠽌同好光猛，再望一望大廳中間，部大電視上面就有一個架托住一個類似法器嘅物體，係一把銀色嘅大刀，我哋覺得好奇怪，好明顯呢一把刀係同呢間房嘅裝修一啲都唔夾，當時我哋都無諗咁多，雖然大家都覺得怪怪哋，講完就算，當佢係一件擺設品就了事啦。

第一晚，我地三條女玩到三點幾，就返入房瞓覺，我好記得自己啱啱瞓著咗無耐，就feel到床尾輕輕咁凹咗落去，好似有人踩咗上床尾咁，嗰種感覺係好真實，所以我知自己唔係發緊夢。過咗一陣，床中間又凹咗落去幾下，仲越嚟越近我，我就意識到件事係真係發生緊！我好驚...唔敢擘大眼，好驚擘大眼會見到奇怪嘢，之後張床又再un下un下，好似啲小朋友跳緊床咁，我心入面喺唸南無阿彌陀佛，我連耶穌都搵埋，佢都係繼續跳咗成晚，直到朝早鬧鐘響先停。

朝早出咗門口，我問瞓我隔離嗰friend，琴日有無feel到啲咩，佢話：「梗係有啦， 好恐怖成晚都有人喺張床上跳嚟跳去，好似響我哋間房開緊party咁， 成晚都無覺好瞓，又唔夠膽擘大眼，又唔敢同你哋講，直到天光先至靜咗落嚟喇」。但係再問另一個friend佢話：「無喎！琴日瞓死咗」，我哋同佢講返件事之後，之後我地都唔敢瞓返嗰間房，同酒店reception講返要換第二間房瞓。