【Mami Wailo】

【Mami Wailo】

我係一名在職媽媽，上年9月生完仔，上個月坐完月返工，同一般打工仔一樣朝八晚六，每日返到屋企起碼七點，根本無乜時間湊仔，本來想請工人，但奶奶堅持唔準我地請，話自已仲有氣有力又有經驗可以幫手湊，又講到工人無血緣關係點會對我個仔好，最後我同老公都覺得既然佢咁有信心唯有信佢啦。

結果奶奶所謂有經驗原來係亂嚟，平時阿仔扭計奶奶就開電視比佢放題，我睇cam見到，為免同佢正面衝突，都會叫老公同奶奶講唔好再係咁，會影響小朋友隻眼同埋令佢有壞習慣。點知奶奶一知我地會睇cam覺得係監視佢，好嬲咁話唔準用，為左家庭和諧我地都照佢意思做。

點知佢都係我行我素唔跟我個套，阿仔平日飲奶都好穩定，但係奶奶成日驚個孫唔飽，一喊就比奶，搞亂哂佢飲奶嘅時間、份量同次數。呢排阿仔瞓得差成日半夜醒，以為係因為天氣時冷時熱影響，點知我最近洗奶樽都聞到有怪味，忍唔住問奶奶佢先話我地知佢沖花旗參水比孫仔飲，話阿B成日扭計係因為天氣乾燥奶粉又燥，飲咗可以清熱，我當刻係嬲到癲，即刻同奶奶反面，阿仔先幾個月大就亂咁比嘢佢飲，仲要唔問下我地。
 

老公聽完淨係話忍下，忍耐到我地請工人先。我對奶奶已經失去信任，但係請工人最快都要兩三個月，到底我應唔應該再交比奶奶湊住先，定係辭職自己湊返呢？

#天機

#讀者來稿

#Mami Wailo