【Mami Wailo】

大家好！先祝各位網友兔年身體健康！最緊要同屋企人一團和氣！出入平安！

但我估計，我今年同屋企人都唔會好和氣，尤其是同我老爺嘅關係應該喺新正頭就已經去到谷底。話說我喺上年嫁左俾我老公，結婚嗰日big day，佢老爺已經對於啲習俗同程序好執着，幾點斟茶，幾點入門出門，佢都搵人擇過晒啲吉時。

講返新年，佢都好注重家嫂應該喺年初一就要同佢拜年，仲要係晨早流流嗰隻。但係我本身係翻開飲食業，喺呢啲大時大節同公眾假期，唔係話放就放，一定要同同事夾到先Okay。我上年都知道初一唔去會好大鑊，所以我同公司要求我一定要放初二去同我老爺拜年，我一心諗住佢會理解我嘅處境。我冇諗過，現實係我一去到佢已經黑起塊面，我向佢送禮物同講祝福語，佢都不瞅不睬。情況一路去到食晚飯都冇改善過，間中仲整幾句冷言冷語俾我嘆吓:「你嫁得入我哋家門，就要尊重我哋屋企嘅規矩！」，「家嫂你做咩工咁巴閉？新年都要你返工？」，「你知唔知中國人從古到今都好注重禮節！」

我心諗，你估我好想做嘢㗎咩？我都想喺屋企Un Un腳唔使做，如果你個仔夠本事，我年初一到年初七日日嚟拜年都得啦！但大家都知道事實係唔可以講出嚟，又為咗避免破壞個關係，我上年都係”Good”一聲吞咗佢算。但最不幸嘅係我今初一初二都要返工，要初三先可以上去拜年，赤口去拜年，我真係唔敢想像個情況會比上年壞幾多，希望唔會家變喇。。。。。。

哈哈！無論結果如何，我再次祝各位身體健康！心想事成！

#Mami Wailo #天機 #HKWisdom