【Mami Wailo】

大家好！我平時成日睇Mami Wailo，今次終於到我投稿同大家呻吓。我喺38歲嘅時候生小朋友，而家佢已經2歲幾，對於我同老公嚟講已經覺得好感恩可以有一個咁可愛嘅小朋友，但係困擾我嘅係應唔應該再生多個，等小朋友大個可以互相支持。

我35歲先結婚，老公大我13年，我地努力咗2年先成功懷孕，醫生話超過35歲算係高齡產婦，懷孕機會率越低，懷孕期間嘅風險都會增加。所以嗰陣啱啱大肚為左安全，我頭四個月都無出過街，最後順利出世。個仔開始返N班，老公有次去接佢放學嗰陣比同學仔問係咪爺爺，聽落都有啲心酸，加上佢個樣又真係顯老，我哋當刻意識到未必可以陪小朋友好長時間，當佢20歲嘅時候我老公已經就快70歲，擔心如果我地都走左，無人可以同佢互相支持。最近考慮緊生多個小朋友，亦都開始努力備孕中，但係年紀大咗身體又無咁好相信比以前更加難。

其實當初我地未成功懷孕嗰陣時有考慮過領養，因為我地都好鍾意小朋友，但係而家情況唔同係已經有一個係親生，如果再領養擔心兩個小朋友會互相比較，有無媽媽都遇過相同問題？

#MamiWailo #天機 #HKWisdom