【Mami Wailo】

家有喜事，我有咗5個月，但係喜悅心情好快就完結咗，事關奶奶一直明示暗示想幫手湊BB，話自己一個當年湊大佢地幾兄弟都無問題。尋日食飯又提起，我老公仲主動同奶奶講到時要計返人工錢比佢。我即刻諗既然奶奶湊都要比錢，咁不如請陪月？

其實我同奶奶唔係一齊住，間中食下飯都相敬如賓，但係就無咩話題啱傾。奶奶想幫手湊BB呢件事，我都有同老公傾過話唔好，一嚟年紀大太操勞，二嚟如果到時我同奶奶意見不合就傷感情，老公聽完都同意。於是當奶奶每次提起我地都係推搪兩句，但係老公尋日唔知做乜竟然比奶奶說服咗，同意比奶奶幫手湊仲話要出糧比佢。

我都同意奶奶係有育兒經驗，但係始終隔左咁多年，以前個套未必適合而家嘅小朋友，奶奶本身都係一個鍾意話事嘅人，到時要佢跟我個套幾乎無乜可能。而且我又唔好意思點奶奶做野，既然都係比錢咁不如請陪月，始終陪月係專業，我又係新手好多問題到時可以請教陪月，點知老公話請外人不如請啊媽，話哂自己人。所以話婆媳關係男人永遠唔明係真理。

想請教大家有無一個兩全方法可以解決呢件事，定我直接話已經請左陪月？

#MamiWailo #天機 #HKWisdom