【Mami Wailo】

我係一個全職媽咪，小朋友今年四歲，但係自從佢返幼稚園就成日病，大家都知小朋友係鍾意周圍摸完又捽眼耳口鼻，自然容易病。但係奶奶成日比說話我聽，講到係我問題唔識照顧小朋友咁。

當初我同老公結完婚，就搬入去同奶奶住，當時老公話佢啊爸走咗得返啊媽一個，唔想佢自己孤零零，我都贊成佢嘅諗法所以一齊住。但係勢估唔到結婚前奶奶對我都算幾好，食完飯唔洗我洗碗又會切生果比我食。結婚之後成個態度唔同哂，當正我係工人咁，就算我要返全職，放工都要煮飯比佢地食仲要洗埋碗，放假想瞓晏啲又比說話我聽，成日話佢後生都係點點點，為咗家庭和諧我都忍佢，老公知道都有叫奶奶收斂吓。

到我大肚期間奶奶又變返慈母，唔洗我做家務又煲湯比我飲。生完BB之後我餵咗三個月母乳，因為要返工唔方便儲奶同埋休息唔夠，所以無再餵人奶，但係奶奶好反對又覺得我係同佢唱反調先唔餵。到小朋友而家返學病多咗，奶奶就比說話我聽，同BB講：「因為媽咪懶唔餵人奶，所以你先咁易病，真係好慘！又成日掛住返工唔理你。」我聽完真係火滾即刻開佢波，就算佢以前點話我都可以忍，但係咁樣亂同我個仔講嘢，離間我地關係就唔得，始終小朋友細，大人講乜都信。

奶奶居然因為我同佢嘈交，就同我老公扮慘，話我唔當佢係奶奶唔尊重佢，又叫我老公一係同我離婚一係同佢斷絕關係。因為呢件事我唔想再同奶奶住，但係老公又擔心奶奶一個住會唔開心，到底我應該點做？

#Mami Wailo #天機 #HKWisdom