【Mami Wailo】

各位讀者好！先祝大家Happy New Year！我想分享吓BB保暖所引伸嘅婆媳問題，因為依樣嘢喺上年12月好困擾我，搞到我同我奶奶嘈咗幾次，當然次次都係要我就佢，全家都要聽佢枝笛。

其實個仔係我嘅，我作為阿媽點會唔緊張，但我覺得唔需要過分緊張。早一兩個月香港係好凍，有幾日直頭得返幾度，所以我喺屋企都會開暖爐，等我個仔喺BB床度確保夠暖。

我個仔喺屋企一般嘅裝束，都會係一件蝴蝶衣打底，外面再加件褸仔同一條長褲，加埋個暖爐，其實點樣都唔會凍親，一定夠晒暖。

但我奶奶次次上到嚟，都一定會彈三彈四，一定會話佢個孫著咁薄會唔夠暖，到時凍親就手尾長……

BUT！喺依一刻嘅我係唔會再同佢坳，因為之前同佢拗嘅時候有啲不愉快嘅經歷。

我記得我當時同佢講「就算係BB都唔使著太多，佢身體會適應到個氣溫同埋著太多衫會影響佢呼吸，咁樣唔健康」…… 奶奶就答我「就係因為你細個親家俾唔夠衫你著，所以搞到你大個都有哮喘，你睇吓手尾幾長」…… 而另一次我同佢講「奶奶你放心啦，我上網同啲網友傾過，大家都覺得著兩三件衫加埋個暖爐已經好夠。」……佢就應我「嘥氣啦！網上嘅嘢都可以信㗎咩？我話要加多兩件就加多兩件衫啦，我一手一腳湊大八兄弟姊妹呀！」

次次一傾到呢個問題，我同BB塊面都會紅晒，BB就係覺得好鬼熱，焗到紅晒，而我就係勞氣得滯谷到紅晒！

#Mami Wailo #天機 #HKWisdom