【Mami Wailo】

大家好，最近我同先生因為放假返唔返奶奶度而爭執，佢覺得放假返去係好平常，我就覺得係一件令我身心更加疲累嘅事，因為每次返去我要照顧全家嘅晚餐、行程。

奶奶早兩日打電話比我老公話嚟緊復活節長假，叫我地同埋個孫一齊返去住幾日，我就提議老公自己帶埋個仔去，個仔都小學三年級唔係太需要照顧，佢一個人都可以處理到，咁樣我又可以有自己時間休息。但係老公一句「你都無野做，點解唔一齊去」，令到我覺得好委屈，原來佢一直睇唔到我嘅辛苦。我係一個全職媽媽，基本上全日24小時都要照顧小朋友、做家務煮飯，我都想可以有自己獨處嘅時間，一個人食飯行下街，就算我真係無野做，點解一定要去老爺奶奶屋企？

我唔係一個唔顧老人家感受嘅人，我同老公一個月會帶埋個仔去老爺奶奶到食飯兩至三次，大時大節都會準備佢地鍾意嘅餸同埋禮物，早排老爺唔舒服入院，我都有每日準備飯盒拎去醫院比老爺。我唔介意照顧家庭，但係我都想有時間可以喘息一下，老公作為家庭經濟支柱，放工返到屋企就話辛苦要休息完全唔幫手，而且完全唔將我嘅付出放喺眼內。

應該點樣令老公明白全職媽媽嘅付出係唔會比佢少？加上小朋友都開始大唔需要我照顧，我都想出去返去做嘢有自己嘅事業，等夫妻嘅關係得到平等。

#MamiWailo #天機 #HKWisdom