【Mami Wailo】

大家好！今日我想同大家分享我奶奶經常性習慣性不通知我嘅情況下上嚟我屋企，有時我個仔去左補習，得返我自己一個人係屋企，老實講，本身同佢又無咩好傾，有時個場面都幾Odd。

我同老公反映過叫奶奶上嚟前通知聲，我話奶奶上嚟都為左睇孫，個孫如果出左去唔喺度，就無謂阻佢老人家時間喇，重點係佢上親嚟都搞着我呢，想Relax下都唔得。

我老公都認同，仲話已經勸左佢地好耐，但喺佢地角度諗，認為唔需要通知聲都可以上嚟，依d觀念一時三刻未改變到，可能需要一d時間。

我有D朋友就話每個家庭Style都唔同，有啲講到明，Even通知咗都唔它人家上嚟，又有另一D係老人家有晒鎖匙可以直接開門，至於跟邊套，就睇返家中「誰大誰惡誰正確」。又有一D朋友話睇你奶奶行為都幾自以為是，甚至有D唔太尊重，仲勸我認真考慮下返出嚟做野，有錢就有Say，講句說話都大聲D。

我都唔知邊一套先正確，我都唔係想阻奶奶上嚟享受嫲孫樂，但係我有時都想有返少少Me time，唔想成日喺屋企準備好晒，無得輕輕鬆鬆咁Hea下Relax下。

虛心求教！

#MamiWailo #天機 #HKWisdom