【Mami Wailo】

【Mami Wailo】我有咗BB八個星期，由上個星期開始，我就一直嘔，基本上食乜嘔乜，好鬼辛苦，心情好差。我今個星期因為真係太過唔舒服，所以請咗病假。但又開始擔心緊下個星期返工嗰陣，會唔會聞到啲味都會令到我想嘔，最慘係我公司廁所都幾遠，所以一諗起會想嘔就好擔心。言歸正傳，話說我奶奶早幾年已經日日講想湊孫，所以佢一知道我有咗BB就十級緊張，日日都打嚟問候我。但日復日咁聽佢電話，聽吓聽吓我覺得越嚟越唔舒服，每次聽完都有想喊嘅感覺，唔知係情緒影響，定係佢啲說話真係太難聽喇。最令我覺得難受嘅係我嘔到想死嗰陣，佢就打嚟同我講「哇！你都算好㗎喇！咁遲先嘔，我嗰陣一路嘔，嘔到生嗰陣呀」。仲有，佢話「你而家返工仲可以請病假喺屋企嘔都算好好㗎啦，我當年做廠，一路嘔仲要一路車衫，嘔都冇得行開」。仲有啲更加離譜嘅，例如「係咪而家覺得媽媽真係好偉大呢，我生你老公嗰陣仲辛苦過你而家10倍啊，所以你要好好對我個仔啊」。我開始唔識應對佢，我直頭已經唔想再聽佢電話，但只要我一miss call一兩次，佢就會打俾我老公，我老公就會打俾我叫我記得覆佢電話，我真係覺得好煩惱，唔知點樣做好~~

#Mami Wailo

#天機

#HKWisdom