靈異事件簿之達德學校
靈異事件簿之達德學校
·
![broken image](http://custom-images.strikinglycdn.com/res/hrscywv4p/image/upload/c_limit,fl_lossy,h_9000,w_1200,f_auto,q_auto/9843492/110013_573125.jpeg)
大家你好,我係2011年前在達德學校鬼故事中,上曬新聞12個少年中其一個。
我好想講番當年呢件事既來龍去脈,唔係新聞講既咁樣,亦都唔係達德學校入面撞鬼。
當日,有朋友提議到達德學校冒險,一班人相約入去玩。當時個個都係後生仔女, 年少力壯 ,冇咩唔夠膽做唔夠膽去玩。
我地到達目的地之後,係學校後門搵路搵窿入去,到達學校近後門籃球場一個隱蔽嘅地方。
當晚大約時間係晚上十點左右, 入去約半個鐘後,其中一個女朋友叫(稱X)突然話上面有人望著我哋,問我哋見唔見,就響個山墳有個人痞左係到(佢所講既山墳係達德學校後門對面既草叢入面),成班仔喺女人面前一定要威威,膽粗粗我哋幾條仔打頭陣上去先(我係行最前個個),沿學校石級一步步上去, 響唔係遠嘅地方 就見到個墳頭, 我哋越行越近,我就越嚟越覺得個頭好痛,越行越唔舒服,到最後頂唔順我回頭第一個衝返落去。
我唔係見到野,而我係聽到上面有人講野同埋有人行過踩斷某啲野既聲。當然我沖番出黎其他男仔都跟埋出黎,出到黎女X就開始覺得自己好唔舒服頭暈反白眼同嘔,我地成班覺得唔對路就一齊抬女X去附近既輕鐡站休息,係月台坐左陣女X都好番好多,而另一位女仔(稱Y)話自己膊頭好重痞左係月台近邊緣位,女Y當時同女X一樣有反白眼同嘔既徵象,有個比我再大幾歲既男仔見到佢好危險驚佢跌落路軌拉番女Y入黎,女Y就訓左係地下一直抽筋,到最後call白車入醫院。成件事情就係咁樣,至於我哋係咪撞鬼,就留返畀讀者自己諗啦。