今次介紹嘅係九龍酒店嘅倚窗閣食自助晚餐，我喺Kkday度訂，價錢$2138，3送1，平均每人$535 。

我首先食咗個蟹皇燕窩生滾粥，即叫即整，顏色一睇已經見到好多蟹皇色。個粥都綿，燕窩溶晒入去，幾好食。之後我就食蠔，蠔佢就有三款：美國，法國同紐西蘭。最期待就當然係生蠔喇，但每次佢只會俾三隻你。再嚟就食蟹腳，啲蟹腳佢地就真係抵讚，新鮮多汁。蟹腳要夠鮮先會肉殼分離，一搣就成條蟹肉出咗嚟，Size當然可以再大啲就更好。肉質相當鮮甜多汁，質素真係幾好。

抖咗陣到食芝士冷盤，有個帶辣味嘅芝士幾出式。之後食龍蝦沙律，佢每次只會fill 6邊，咸沙律加上龍蝦肉茸，味道香口，但Size唔係話好大隻。食到差唔多，跟住飲咗個燉湯潤下，個燉湯係海底椰煲雪梨，簡潔清新，清熱潤肺。諗住收工食甜品嗰陣俾我見到個鵝肝，所以試埋，細細件，幾脆口 ，唔錯。最後食甜品都多款選擇，我試咗其中幾款，都唔差。埋尾食多個Häagen-Dazs ，雪糕雪條都有得任食，我都食咗兩杯雪糕。

總結成餐都唔錯， 你話質素好高又唔算，但呢個價錢呢個質素就性價比高，值得一試。