3大賞楓好去處

近排個個都睇紅葉，唔通個個都識睇紅葉咩。想睇紅葉，但又嫌去旅行太貴太遠? 近近地香港咪有囉! 每年嘅秋冬季節，除咗上山打卡芒草之外，去郊外觀賞紅葉亦係必去嘅秋冬郊遊好去處。

1. 元朗大棠

大棠係全香港最出名同熱門的嘅睇紅葉地點，因為呢度坐擁全港最多最密集嘅楓香樹，所以一到12月，大棠道嘅大欖郊野公園都會有好多人流。好多攝影發燒友都會帶長短鏡頭、腳架拍低紅葉景色。係日落時分打卡，可以捕捉到紅葉變成金黃色嘅畫面。另外，去楓香林嘅路段係平路，十分易行，加上郊野公園有燒烤場同水塘靚景，非常適合一家人一齊去。要去大棠嘅人士，可以係元朗搭港鐵巴士K66或者紅頂小巴，係大棠山道巴士總站落車，沿車路行上山，大約60分鐘就到達楓香林。

2. 青衣公園

唔想去咁遠，其實市區都有地方可以欣賞到紅葉。距離港鐵青衣站5分鐘路程嘅青衣公園，種植咗落羽松同杉樹，一到秋冬季節就會轉為紅葉、黃葉，倒影係湖面上，感覺好似去咗外國咁，所以被稱為「港版加拿大湖景」。市民可係公園嘅草地上一邊野餐、一邊睇紅葉打卡，又或者去對面嘅觀景台，影下落羽松一字排開嘅景色。

3. 烏蛟騰

踏入秋冬時分，成條烏蛟騰郊遊徑都可以揾到紅葉踪影，加上郊遊徑只有輕微嘅上落斜坡段，係一條易行嘅行山徑。沿住烏蛟騰郊遊徑，往三椏涌方向行20分鐘左右，就可發現十多棵楓樹，九擔租係紅葉最密集的一段。踏入 12 月之後，呢啲楓樹上嘅綠葉就會轉紅，形成紅葉滿椏嘅景觀。最方便方法，就係港鐵大埔墟站搭20R小巴，係總站烏蛟騰落車。